Bugun jahon chempionati boshlandi - Oʻzbekistonni tarixiy debyut kutmoqda

11-iyun kuni futbol bo‘yicha jahon chempionati — FIFA tarixidagi eng yirik turnir — start oldi. U 19-iyulgacha davom etadi va ilk bor bir vaqtning o‘zida uchta davlatda: AQSH, Kanada va Meksikada o‘tkaziladi. O‘yinlar 16 ta shaharda bo‘lib o‘tadi, ular orasida Mexiko, Nyu-York va Los-Anjeles ham bor.

2026-yilgi jahon chempionati allaqachon tarixdagi eng yirik turnir deb atalmoqda:

• 48 ta milliy jamoa va rekord darajadagi geografiya;
• 16 ta shahar va uchta mezbon davlat;
• turnir qariyb 40 kun davom etadi;
• kengaytirilgan pley-off va 1/16 final bosqichi.

Asosiy o‘zgarish — yangi format. Turnirda odatdagi 32 ta o‘rniga 48 ta jamoa ishtirok etadi. Jamoalar 12 ta guruhga bo‘lingan, umumiy o‘yinlar soni esa 104 taga yetdi.

Jahon chempionatida ilk bor O‘zbekiston, Iordaniya, Kabo-Verde va Kyurasao terma jamoalari ishtirok etadi.

Opta tahlilchilarining bahosiga ko‘ra, chempionlik uchun asosiy da’vogar — Ispaniya (taxminan 16%). Yetakchilar qatorida Fransiya (13%) va Angliya (11,2%) ham bor. Amaldagi chempion Argentina kuchli to‘rtlikda, biroq ehtimol jihatidan Yevropa jamoalaridan ortda.

Kuzatishga arziydigan jamoalar:

• Ispaniya — Yevropadagi eng yosh va hujumkor jamoalardan biri;
• Fransiya — Kilian Mbappe boshchiligidagi kuchli tarkib;
• Angliya — kuchli hujum va yangilangan o‘yin uslubi;
• Argentina — Lionel Messining ehtimoliy so‘nggi turniri;
• Portugaliya — tajriba va yangi yulduzlar uyg‘unligi.

Mintaqa uchun eng muhim voqea — O‘zbekiston terma jamoasining debyuti. Jamoa tarixda birinchi marta jahon chempionatiga yo‘l oldi. Saralashda guruhni ikkinchi o‘rinda yakunlab, kuchli raqiblarni ortda qoldirdi. O‘zbekiston Markaziy Osiyodan mundialga chiqqan ilk davlat bo‘ldi.

Guruh bosqichida O‘zbekiston Portugaliya, Kolumbiya va Kongo DR bilan o‘ynaydi — bu eng murakkab guruhlardan biri hisoblanadi.

Ochilish uchrashuvi Mexikoda “Astekа” stadionida bo‘lib o‘tadi, final esa Nyu-Yorkdagi MetLife arenasida o‘tkaziladi.