Mirziyoyev SPIEFda soʻzga chiqib, Yevroosiyo texnologik kamarini yaratishni taklif qildi

O‘zbekiston prezidenti Shavkat Mirziyoyev 5-iyun kuni Sankt-Peterburg xalqaro iqtisodiy forumining yalpi sessiyasida nutq so‘zladi.

Unda Vladimir Putin, Samia Suluhu Hasan va Xan Chjen ham ishtirok etdi.

Prezident global iqtisodiyotda chuqur o‘zgarishlar ketayotganini ta’kidladi: logistika yo‘llari o‘zgarmoqda, yangi ishlab chiqarish zanjirlari shakllanmoqda, texnologiyalar roli ortmoqda.

«Raqobat endi faqat bozorlar va resurslar uchun emas, balki texnologiyalar, algoritmlar, logistika va infratuzilma sohasiga ko‘chmoqda», — dedi Shavkat Mirziyoyev.

Unga ko‘ra, O‘zbekiston tarixan hamkorlik va savdo markazi bo‘lib kelgan va ochiqlik mamlakatning asosiy tamoyili hisoblanadi.

Rossiya bilan hamkorlikda savdo, sanoat, energetika va hududlararo aloqalar rivojlanayotgani qayd etildi.

Prezident «Yevrosiyo texnologik sanoatlashuv kamari»ni yaratishni taklif etdi. Bu loyiha yagona raqamli platforma asosida ishlab chiqarish klasterlarini birlashtirishni nazarda tutadi.

Asosiy yo‘nalishlar:

• raqamli iqtisodiyotni rivojlantirish;
• qo‘shma raqamli ekotizim yaratish;
• sun’iy intellekt yechimlarini joriy etish.

Shuningdek, ta’lim, kasbiy tayyorgarlik va mehnat bozorini bog‘laydigan onlayn platforma yaratish taklif qilindi.

Madaniy hamkorlikni kengaytirish uchun «Samarqanddan Peterburgga» loyihasini ishga tushirish rejalashtirilmoqda.

Prezident islohotlar natijasida biznes muhiti yaxshilanganini va iqtisodiy o‘sish ta’minlanayotganini qayd etdi. Asosiy resurs sifatida yoshlar salohiyati alohida ta’kidlandi.

Investorlar Toshkent xalqaro moliya markaziga hamda 16–18 iyun kunlari o‘tkaziladigan xalqaro investitsiya forumiga taklif qilindi.