Xitoy sun’iy intellekt mutaxassislari uchun xorijga chiqishga cheklov joriy etdi

Xitoy hukumati sun’iy intellekt sohasidagi mutaxassislarning xorijga chiqishi ustidan nazoratni kuchaytirdi. Bloomberg xabar berishicha, cheklovlar nafaqat davlat sektoriga, balki xususiy kompaniyalarga ham tegishli.

Yangi qoidalar Pekin mamlakat uchun strategik muhim deb hisoblagan xodimlarga taalluqlidir. Gap boshqa narsalar qatorida ilgʻor AI texnologiyalarini ishlab chiquvchilar va Alibaba va DeepSeek kabi kompaniyalarning top-menejerlari haqida bormoqda. Endi chet elga chiqish uchun ular oldindan maxsus ruxsat olishlari kerak.

Sayohatni cheklash amaliyoti uzoq vaqtdan beri davlat kompaniyalari rahbarlari, olimlar va nozik loyihalar ishtirokchilari uchun amal qiladi. Misol uchun, top-menejerlar va partiya amaldorlari koʻpincha chet el pasportlarini saqlash uchun ish beruvchiga topshiradilar. Biroq, ilgari bunday choralar xususiy sektorga tatbiq etilmagan.

Endilikda startaplar asoschilari, tadqiqotchilar va AI sohasidagi kompaniyalar rahbarlari ham cheklovlarga duchor boʻlmoqda. Bunda tanlash mezonlari nafaqat lavozim, balki mutaxassisning mamlakat uchun ahamiyatini baholash bilan ham belgilanadi.

Xitoy sun’iy intellektga nafaqat iqtisodiy resurs, balki milliy xavfsizlik omili sifatida ham qaraydi. Shu nuqtai nazardan, ba’zi soha mutaxassislariga AQShga sayohat qilmaslik tavsiya etilgan.

Rasmiylar xorijga chiqqan mutaxassislar orqali muhim ma’lumotlar oshkor bo‘lishi yoki ular siyosiy muzokaralarda bosim vositasi sifatida ishlatilishidan xavotir bildiradi.