Krishtianu Ronaldu to‘rtinchi yil ketma-ket Forbes reytingida yetakchi

Forbes talqiniga ko‘ra, portugaliyalik futbolchi Krishtianu Ronaldu yana dunyoning eng ko‘p maosh oluvchi sportchisi bo‘ldi — u bu maqomni ketma-ket to‘rtinchi yil saqlab kelmoqda. 2026-yil yakunlariga ko‘ra, uning daromadi $300 mlnni tashkil etdi.

Dunyodagi eng yuqori daromadli 50 sportchining jami daromadi $4,1 mlrdga yetdi, bu o‘tgan yilgi $4,2 mlrd ko‘rsatkichdan taxminan 3% kam. Forbes qayd etishicha, pasayish asosan NFLda yirik shartnomalar sonining kamayishi bilan bog‘liq. Shunga qaramay, bu natija inflyatsiya hisobga olinmagan holda tarixdagi ikkinchi eng yuqori ko‘rsatkich bo‘lib qolmoqda.

Top-50 sportchilarning asosiy daromadi sport faoliyatidan kelgan: ular taxminan $3 mlrdni maoshlar, bonuslar va mukofot pullari hisobidan topgan. Yana $1,1 mlrd esa reklama shartnomalari, biznes loyihalar, ommaviy chiqishlar va boshqa tijorat faoliyatlaridan olingan.

Ronaldu o‘z daromadining $235 mlnini futbol faoliyatidan, $65 mlnini esa reklama va biznes loyihalardan olgan. Reytingda ikkinchi o‘rinni meksikalik bokschi Kanelo Alvares ($170 mln), uchinchi o‘rinni esa argentinalik Lionel Messi ($140 mln) egalladi.

Reytingda eng ko‘p vakillikka ega sport turi basketbol bo‘ldi: ro‘yxatga 20 nafar NBA o‘yinchisi kirdi, bu o‘tgan yilga nisbatan to‘rttaga ko‘p.

Umuman olganda, 2026-yil ro‘yxatiga 18 davlatdan sportchilar va sakkiz xil sport turi vakillari kiritilgan. Top-50 ga kirish uchun minimal daromad $54,6 mlnni tashkil etdi — bu ko‘rsatkich bilan italiyalik tennischi Yannic Sinner ro‘yxatni yakunladi.

2026 yilning eng ko‘p daromad topgan sportchilari (top-10):

1. Krishtianu Ronaldu — $300 mln
2. Kanelo Alvares — $170 mln
3. Lionel Messi — $140 mln
4. Lebron Jeyms — $137,8 mln
5. Syohei Otani — $127,6 mln
6. Stiven Karri — $124,7 mln
7. Jon Ram — $107 mln
8. Karim Benzema — $104 mln
9. Kevin Dyurant — $103,8 mln
10. Lyuis Xemilton — $100 mln