Shavkat Mirziyoyev Boku shahrida Butunjahon Urbanizatsiya forumining ochilishida ishtirok etdi

O‘zbekiston Respublikasi Prezidenti Shavkat Mirziyoyev 18-may kuni Boku shahrida o‘tayotgan Butunjahon urbanizatsiya forumining 13-sessiyasi ochilish marosimida ishtirok etdi. Mazkur forum BMTning Aholi punktlari bo‘yicha dasturi – UN-Habitat homiyligida tashkil etildi.

Tadbir poytaxtdagi Kongress-markazida bo‘lib o‘tdi. Unda davlat rahbarini Ozarbayjon Prezidenti Ilhom Aliyev va UN‑Habitat ijrochi direktori Anaklaudiya Rossbax kutib oldi. Marosim yakunida ishtirokchilar birgalikda sur'atga tushdi.

Forumning bu yilgi mavzusi — “Barcha uchun uy-joy: xavfsiz va barqaror shaharlar hamda hamjamiyatlar”. Unda turli davlatlar rahbarlari, hukumat vakillari va xalqaro tashkilotlar mutasaddilari qatnashmoqda.

Kun tartibidan shaharlarni barqaror rivojlantirish, arzon va zamonaviy uy-joy bilan ta’minlash, shahar muhitini yaxshilash, iqlim barqarorligini mustahkamlash hamda transport va ijtimoiy infratuzilmani rivojlantirish masalalari o‘rin olgan.

E’tiborli jihati — forum doirasida Shavkat Mirziyoyev Yetakchilar sammitida nutq so‘zlaydi. Bu chiqish mamlakatdagi urbanizatsiya va infratuzilma rivoji haqida bo‘lishi kutilmoqda.