Rossiyaliklar uchun Italiya vizasi qiyinlashdi — yangi cheklovlar joriy etildi

Rossiya fuqarolari uchun Italiya vizasini olish jarayoni ancha murakkablashdi. Italiyaning VMS va AlmavivA viza markazlari hujjatlarni vositachilar orqali qabul qilishni to‘xtatdi.

Endilikda arizachilar hujjatlarni shaxsan topshirishi, pasport va onlayn ro‘yxatdan o‘tganini tasdiqlashi shart. Faqat ayrim akkreditatsiyalangan turfirmalar uchun istisno mavjud bo‘lib, u ham to‘liq turpaket xarid qilinganda amal qiladi.

ATOR ma’lumotiga ko‘ra, yangi qoidalar sabab viza olish muddati cho‘zilmoqda. Moskva va viloyat aholisi iyun oxirigacha navbat ololmasligi mumkin, hududlarda esa kutish iyulgacha davom etadi. Umumiy jarayon 4 oygacha cho‘zilishi mumkin.

Shu bilan birga, talab oshgani sabab ayrim vositachilar xizmatlar narxini keskin oshirgan. Biroq keyinchalik bunday takliflar bekor qilingan.

Koʻrilgan chora-tadbirlar Italiyaning Oʻzbekistondagi sobiq elchisi Pergabrella Papadia de Bottini di Sant’Agnese bilan bogʻliq shov-shuvli tekshiruvdan soʻng amalga oshirildi. Tergov ma’lumotlariga koʻra, diplomat va uning atrofidagilar Rossiya fuqarolariga Shengen vizalarini noqonuniy berish sxemasida ishtirok etishlari mumkin edi.

Italiya matbuotiga koʻra, gap 4 mingdan 16 ming yevrogacha boʻlgan toʻlov evaziga uzoq muddatli vizalar berish haqida ketmoqda. Taxminlarga koʻra, kamida 95 kishi standart tekshiruvlarni chetlab oʻtib, Italiyaga kirishga muvaffaq boʻlgan.

Tergov, shuningdek, sayyohlik kompaniyalarining ishtiroki va arizalarni topshirishning muqobil kanallari, jumladan, messenjerlardan foydalanishni tekshirmoqda. Jami 400 ga yaqin viza ishi va ish boʻyicha ayblanuvchilar bilan bogʻliq mol-mulk tahlil qilinmoqda.