AQShda Donald Tramp tasviri tushirilgan cheklangan pasportlar chiqarilishi rejalashtirilmoqda

AQSh Davlat departamenti Donald Tramp tasviri tushirilgan cheklangan miqdordagi pasportlar seriyasini tayyorlamoqda. Fox News telekanali xabar berishicha, mazkur tashabbus 2026 yil iyul oyida nishonlanadigan AQSh mustaqilligining 250 yilligiga bag‘ishlanadi.

E’lon qilingan maketlarga ko‘ra, prezident portreti pasportning ichki sahifalaridan birida joylashtiriladi. Dizayn AQSh Mustaqillik deklaratsiyasidan parchalar hamda davlat bayrog‘i tasviri bilan uyg‘unlashtirilgan.

Shuningdek, hujjat sahifalaridan birida rassom Jon Trambull tomonidan yaratilgan, AQSh asoschilari tasvirlangan “Mustaqillik deklaratsiyasi” kartinasining reproduksiyasi keltiriladi. Ushbu asar Amerika davlatchiligi tarixida muhim ramzlardan biri hisoblanadi.

Fox News ma’lumotiga ko‘ra, yangi namunadagi pasportlar oddiy tartibda ariza topshirgan barcha AQSh fuqarolari uchun ochiq bo‘ladi. Gap asosiy pasport o‘rnini bosish haqida emas, balki cheklangan yubiley seriyasi haqida ketmoqda.

Protokol va davlat ramzlari bo‘yicha mutaxassislar ta’kidlashicha, tarixiy sanalarga bag‘ishlangan maxsus hujjatlar ko‘plab davlatlarda amaliyotga ega. Shu bilan birga, amaldagi davlat rahbari obrazining rasmiy hujjatlarda qo‘llanishi AQSh jamiyatida keng muhokamalarga sabab bo‘lishi mumkin.

AQSh Davlat departamenti hozircha pasportlarning yakuniy dizayni va muomalaga chiqarilish muddatlari bo‘yicha rasmiy izoh bermagan.