Yaponiya qirgʻoqlarida kuchli zilzila sodir boʻldi, sunami haqida ogohlantirish e’lon qilindi

Yaponiyaning shimoli‑sharqiy sohillari yaqinida 20ғaprel kuni 7,5 magnitudali kuchli zilzila qayd etildi. Zilzila epitsentri Tinch okeanida, sayoz chuqurlikda joylashgan bo‘lib, bu sunami yuzaga kelishi xavfini oshirdi.

Yer silkinishlaridan so‘ng mamlakat meteorologiya xizmati sunami xavfi haqida ogohlantirish e’lon qildi. Qirg‘oqbo‘yi hududlarida suv sathining dastlabki ko‘tarilishi kuzatilib, to‘lqinlar balandligi 80 santimetrgacha yetdi. Mutaxassislar to‘lqinlar kuchayishi ehtimolini istisno etmadi.

Hokimiyat organlari qirg‘oqbo‘yi aholi punktlarida yashovchilarni, jumladan Otsuchi va Kamaishi shaharlarida, xavfsiz hududlarga ko‘chirishga kirishdi. Favqulodda xizmatlar ishini muvofiqlashtirish uchun tezkor shtab tashkil etildi.

Zilzila oqibatida ayrim hududlarda, xususan, yuqori tezlikdagi poyezdlar harakati vaqtincha to‘xtatildi. Energetika kompaniyalari infratuzilma obyektlari, jumladan atom elektr stansiyalarini tekshirdi. Ularning xabar berishicha, obyektlar faoliyatida nosozliklar aniqlanmagan.

Seysmologlar yaqin kunlar va haftalar davomida takroriy yer silkinishlari bo‘lishi mumkinligidan ogohlantirmoqda va aholiga rasmiy xabarlarga amal qilishni tavsiya etmoqda.