Mamlakatda QR-kod orqali yagona toʻlov tartibi tasdiqlandi

Oʻzbekistonda QR‑koddan foydalangan holda naqdsiz hisob‑kitoblarni amalga oshirishning yagona tartibi tasdiqlandi. Yangi qoidalar tovarlar va xizmatlar uchun toʻlovlarni soddalashtirish, shuningdek, toʻlov jarayonlarini yagona standart asosida tashkil etishga qaratilgan.

Yagona QR‑kod tizimi orqali bank yoki toʻlov servisidan qat’i nazar toʻlovlarni qabul qilish imkoniyati yaratiladi. Xaridorlar oʻzlariga qulay boʻlgan istalgan mobil ilovadan foydalanishi mumkin boʻladi, sotuvchilarga esa har bir operator uchun alohida yechimlarni ulash talab etilmaydi.

Yangi tizimni joriy etish bosqichma-bosqich amalga oshiriladi va savdo hamda xizmatlar sohasida faoliyat yurituvchi yuridik shaxslarni qamrab oladi. Tizimning asosini bank va nobank toʻlov servislarining oʻzaro mosligini taʼminlaydigan yagona toʻlov infratuzilmasi tashkil etadi. Unda statik va dinamik QR‑kodlardan foydalanish, shuningdek, toʻlovlar haqidagi maʼlumotlarni real vaqt rejimida avtomatik qayta ishlash nazarda tutilgan.

Foydalanuvchilar uchun toʻlov jarayoni yanada qulaylashadi: QR‑kodni skanerlash, toʻlov summasini tekshirish, operatsiyani tasdiqlash va elektron chekni olish kifoya qiladi. Barcha operatsiyalar tarixi mobil ilovada saqlanadi.

Yagona QR‑kodni joriy etish mamlakat moliya tizimini raqamlashtirish jarayonining bir qismi hisoblanadi. Avvalroq QR‑kod orqali toʻlovlarni qabul qilish majburiyati yakka tartibdagi tadbirkorlar va oʻzini oʻzi band qilgan shaxslarga nisbatan belgilangan boʻlsa, endilikda ushbu yagona qoidalar bozor ishtirokchilarining yanada keng doirasiga tatbiq etiladi.