Navoiy viloyatida noqonuniy oltin qazib olish natijasida 13 milliard soʻmlik zarar yetkazildi

Navoiy viloyatida noqonuniy ravishda oltin qazib olish va uni qayta ishlash bilan shug‘ullangan guruhlar faoliyatiga chek qo‘yildi. Huquqni muhofaza qiluvchi organlar ma’lumotiga ko‘ra, davlat va atrof-muhitga yetkazilgan umumiy zarar 13 milliard so‘mdan oshgan.

Holatlardan birida Davlat xavfsizlik xizmati xodimlari ichki ishlar organlari bilan hamkorlikda davlat zaxira yerlari hududida oltin tarkibli ruda qazib olgan uyushgan guruhni aniqladi. Tergov jarayonida ushbu noqonuniy faoliyatga Samarqand viloyatida yashovchi 38 yoshli shaxs rahbarlik qilgani ma’lum bo‘ldi.

Xom ashyoni qayta ishlash uchun u Karmana tumanidagi sobiq parranda xo‘jaligi binosini ijaraga olib, unda kimyoviy reagentlar va laboratoriya uskunalaridan foydalangan holda yashirin ishlab chiqarish sexini tashkil etgan.

Tezkor tadbirlar davomida 200 kilogrammga yaqin yarim tayyor oltin mahsuloti, 200 dan ortiq qop oltin tarkibli ruda, 300 kilogrammga yaqin kimyoviy moddalar, shuningdek maxsus texnika, gaz ballonlari va uskunalar musodara qilindi. Ushbu holat bo‘yicha dastlabki zarar miqdori 7 milliard so‘mdan ortiq deb baholanmoqda. Jinoyat ishi qo‘zg‘atilgan, tergov harakatlari davom etmoqda.

Ikkinchi holatda huquqni muhofaza qiluvchi organlar Navbahor tumanida noqonuniy oltin qazib olish holatini aniqladi. Mahalliy korxonalardan birining rahbari qalbaki ruxsatnoma hujjatlaridan foydalangan holda “Sarmishsoy” davlat muzey-qo‘riqxonasi hududida yer osti boyliklarini o‘zlashtirishni yo‘lga qo‘ygan.

Ishlarga 19 nafar shaxs jalb etilgan bo‘lib, qazish ishlari taxminan 8 gektar maydonda olib borilgan. O‘tkazilgan operatsiya natijasida 6 kilogrammga yaqin yarim tayyor oltin, 430 tonnadan ortiq oltin tarkibli ruda, kimyoviy moddalar, shuningdek yuk transporti va texnologik uskunalar musodara qilindi. Ushbu holat bo‘yicha yetkazilgan zarar 6,1 milliard so‘m etib baholanmoqda.

Hozirda laboratoriya ekspertizalari tayinlangan. Mutaxassislar noqonuniy faoliyat oqibatida yetkazilgan ekologik zarar hajmini aniqlamoqda.

Huquqni muhofaza qiluvchi organlar fuqarolarga foydali qazilmalarni noqonuniy qazib olish holatlari haqida 1520 qisqa raqami orqali xabar berishni eslatib o‘tadi. Murojaat qiluvchilarning shaxsi maxfiy saqlanishi kafolatlanadi.

Qayd etilishicha, Navoiy viloyatida bunday qonunbuzarliklar birinchi bor aniqlanayotgani yo‘q — avval ham bu yerda davlat yerlarida sanoat miqyosida oltin qazib olgan noqonuniy artellar faoliyati fosh etilgan.