Oʻzbekiston va YUNESKO hamkorlikni 2027-yilgacha rivojlantirishga kelishib oldi

YUNESKO bosh qarorgohida O‘zbekistonning YUNESKO ishlari bo‘yicha Milliy komissiyasi hamda San’at va madaniyatni rivojlantirish jamg‘armasi raisi Gayanе Umerovaning tashkilot bosh direktori Xolid al-Anani bilan uchrashuvi bo‘lib o‘tdi.

Uchrashuv yakunida O‘zbekiston Respublikasi Hukumati bilan YUNESKO o‘rtasida hamkorlik to‘g‘risidagi Bitim, shuningdek 2026–2027-yillarga mo‘ljallangan Yo‘l xaritasi imzolandi.

Hujjatlar tomonlarning ta’lim, fan, madaniyat, kommunikatsiya va axborot sohalaridagi hamkorligini belgilaydi hamda qo‘shma loyihalar va dasturlarni amalga oshirishga qaratilgan.

Bitim O‘zbekiston Respublikasi Prezidenti tomonidan 2025-yil noyabr oyida Samarqandda o‘tkazilgan YUNESKO Bosh konferensiyasining 43-sessiyasi chog‘ida ilgari surilgan tashabbuslarning amaliy ijrosini mustahkamlaydi.

Yo‘l xaritasi hamkorlikning aniq mexanizmlarini, jumladan ta’lim tashabbuslarini rivojlantirish, madaniy loyihalarni qo‘llab-quvvatlash va ilmiy tadqiqotlarni kengaytirishni o‘z ichiga oladi.