24-dekabrdan Toshkentda avtomobillarni evakuatsiya qilish qoidalari o’zgaradi

24-dekabrdan Toshkentda Vazirlar Mahkamasining 508-son qarori kuchga kiradi. U avtomobillarni evakuatsiya qilish va jarima maydonchalari faoliyati tartibini o’zgartiradi. Hujjat sentabr oyida qabul qilingan, muddatlarni Yo’l harakatini tashkil etish markazi eslatdi.

Butun jarayon, yuklashdan tortib avtomobilni topshirishgacha, yagona elektron tizimga o’tkaziladi. Haydovchi avtomobil evakuatorga yuklanishidan oldin qaytib kelib, qoidabuzarlikni bartaraf etsa, mashina olib ketilmaydi. Yuklash boshlangan bo’lsa, evakuatsiya davom ettiriladi.

Saqlash uchun haq yuklash boshlangan daqiqadan hisoblanadi, har bir sutka uchun. Avtomobil faqat elektron tizimdan olingan QR-ruxsatnoma bo’yicha topshiriladi.

Mashina olinmasa nima bo’ladi:

• olti oydan keyin qarz majburiy undiriladi;
• 12 oydan keyin sud avtomobilni egasiz deb topishi mumkin.

Qoidabuzarlik qancha turadi:

• evakuatsiya: 1 km uchun 88 ming so’mgacha, lekin 1,76 million so’mdan oshmaydi;
• jarima maydonchasida saqlash: sutkasiga 88 ming so’mgacha;
• misol: 3 km evakuatsiya va 3 sutka saqlash 528 ming so’mni tashkil etadi, qoidabuzarlik uchun jarima bundan tashqari.

Hozir evakuatsiya xizmatlarini turli xususiy kompaniyalar ko’rsatadi, tariflar shahar darajasida tartibga solinmagan. Iyun boshida Toshkent hokimi Shavkat Umurzakov poytaxt uchun 120 ta evakuator xarid qilish hamda evakuatsiya va avtomobillarni saqlashning yangi yagona tizimini joriy etish rejalari haqida gapirgan edi.

Markaz haydovchilarni qoidalarni buzmaslikka chaqirdi: «Pul to’lamaslikning eng yaxshi yo’li, qoidani buzmaslik». Mutaxassislarning ta’kidlashicha, bitta avtomobil 8–12 kvadrat metr joy egallaydi, uni yo’lakka qo’yganda bu metrlar piyodalardan tortib olinadi. Yaqin atrofda ruxsat etilgan joy bo’lmasa, markaz biroz uzoqroqqa borib, bir necha daqiqa piyoda yurishni yoki jamoat transportidan foydalanishni maslahat beradi.