Toshkentda o‘quv markaziga rejalashtirilgan bosqin oldi olindi

Toshkent shahar IIBB va Davlat xavfsizlik xizmati xodimlari o‘quv markaziga bosqin uyushtirishga tayyorgarlik ko‘rganlikda gumon qilinayotgan uch kishini qo‘lga oldi. Huquqni muhofaza qiluvchi organlarga ko‘ra, ular markazdagi pulni olib, keyin O‘zbekistondan chiqib ketishni rejalashtirgan.

Tergov o‘quv markazining 1995-yilda tug‘ilgan sobiq qo‘riqchisini reja tashkilotchisi deb hisoblamoqda. Toshkent shahar IIBB ma’lumotiga ko‘ra, u markazda katta miqdorda pul saqlanishini bilgan va hujumga tanishlarini jalb qilgan.

Sobiq qo‘riqchi binodagi vaziyatni oldindan o‘rganishi va pul saqlanayotgan joyni sheriklariga ko‘rsatishi kerak bo‘lgan. Guruhning boshqa a’zosi elektr ta’minotini uzish vazifasini olgan.

Tergov talqiniga ko‘ra, yuzlarini niqob bilan yashirgan guruh a’zolari binoning orqa eshigidan kirib, pullarni qoplarga joylashi va ijaraga olingan avtomobilda voqea joyidan ketishi lozim edi. Ulardan biri guvohlarni chalg‘itish va tashqi ko‘rinishini yashirish uchun ayollar kiyimini kiygan.

Gumonlanuvchilar bosqindan keyin Farg‘ona viloyati orqali qo‘shni davlatga chiqib ketishni rejalashtirgan, deyiladi IIBB xabarida.

Gumonlanuvchilar pulni ololmasdan qo‘lga tushgan

Toshkent shahar IIBB va Davlat xavfsizlik xizmati xodimlari uch kishini ular o‘quv markazidagi pulni qo‘lga kiritishidan oldin ushlagan.

Tintuv vaqtida quyidagilar topilgan:

• niqoblar;
• bolg‘a;
• qo‘lqop va qop;
• ratsiyalar;
• eshik ochishga mo‘ljallangan moslamalar;
• kalit nusxalari;
• xorijga chiqish pasporti.

O‘quv markazida qancha pul saqlangani va huquqni muhofaza qiluvchi organlar tayyorlanayotgan bosqin haqida qanday ma’lumot olgani ochiqlanmagan. Markazning nomi va manzili ham keltirilmagan.

Jinoyat ishi qo‘zg‘atildi

Tergov boshqarmasi O‘zbekiston Jinoyat kodeksining 164-moddasi 2-qismi «a» va «b» bandlari bilan jinoyat ishini qo‘zg‘atdi. Mazkur moddalar qurol yoki qurol sifatida ishlatilishi mumkin bo‘lgan buyumlarni qo‘llab, oldindan til biriktirgan guruh tomonidan bosqinchilik sodir etishga taalluqli.

O‘zbekiston Oliy sudi Plenumi tushuntirishiga ko‘ra, o‘zganing mol-mulkini hayot yoki sog‘liq uchun xavfli zo‘rlik ishlatib yoxud shunday zo‘rlik bilan tahdid qilib egallash bosqinchilik sifatida baholanadi.

Uch gumonlanuvchi qamoqqa olindi. Dastlabki tergov davom etmoqda.

Gumonlanuvchilarning aybi sud hukmi bilan aniqlanmaguncha ular aybsiz hisoblanadi. Jinoyat kodeksida hech kim sud hukmisiz jinoyat sodir etishda aybdor deb topilishi va jazoga tortilishi mumkin emasligi belgilangan.