Toshkentda motosikl haydovchisi YTH oqibatida halok bo‘ldi

Toshkent shahrida motosikl ishtirokidagi yo‘l-transport hodisasi bir kishining o‘limi bilan yakunlandi, deb xabar berdi poytaxt IIBB YHXB.

Hodisa 25-sentabr kuni soat 22:45 da Mirobod tumanidagi Kichik halqa avtomobil yo‘lida, 83-maktab ro‘parasida sodir bo‘lgan. Dastlabki ma’lumotlarga ko‘ra, 21 yoshli motosikl haydovchisi o‘zi bilan bir yo‘nalishda harakatlanayotgan GAZ 5312 yuk avtomobili bilan to‘qnashgan. Shundan so‘ng u qarama-qarshi yo‘nalishda harakatlanayotgan Kia K5 avtomobili bilan ham to‘qnashib ketgan.

YTH oqibatida jabrlangan haydovchi shifoxonaga olib borilgan. Biroq ko‘rsatilgan tibbiy yordamga qaramay, u reanimatsiya bo‘limida vafot etgan. Mazkur holat yuzasidan jinoyat ishi qo‘zg‘atilgan. Hozirda tergov harakatlari olib borilmoqda.