Saida Mirziyoyeva BMT Bosh Assambleyasining 81-sessiyasida O‘zbekiston nomidan nutq so‘zlaydi

Prezident Administratsiyasi rahbari Saida Mirziyoyeva joriy yilda Birlashgan Millatlar Tashkiloti Bosh Assambleyasining 81-sessiyasi doirasida o‘tkaziladigan umumiy munozaralarda O‘zbekiston nomidan nutq so‘zlaydi. 21-sentabr kuni Nyu-Yorkda sessiya doirasida Saida Mirziyoyeva BMT bosh kotibi Antoniu Guterrish bilan uchrashdi.

«O‘zbekiston va BMT birgalikda rivojlantirayotgan barcha muhim yo‘nalishlarni muhokama qildik», deb yozdi u o‘zining Telegram-kanalida.

Saida Mirziyoyevaning ta’kidlashicha, murakkab xalqaro vaziyat sharoitida Antoniu Guterrishning global yetakchiligi va O‘zbekistonga xavfsizlik masalalarida ko‘rsatayotgan yordami alohida ahamiyatga ega.

22-sentabrdan BMT Bosh Assambleyasining yuqori darajadagi haftaligi boshlanadi. Unda dunyoning qariyb 130 nafar davlat va hukumat rahbarlari ishtirok etib, xalqaro hamjamiyatga murojaat qiladi.

Umumiy munozaralar 22-26-sentabr kunlari hamda 28-sentabr kuni davom etadi. Joriy sessiya mavzusi «Ishonchni tiklash va o‘zgarishlarni boshqarish: har bir inson manfaatlari yo‘lida xizmat qiluvchi BMT» deb belgilangan.

O‘tgan yili BMT Bosh Assambleyasining 80-sessiyasida O‘zbekiston nomidan Prezident Shavkat Mirziyoyev nutq so‘zlagan edi.

Saida Mirziyoyeva bundan oldin ham BMT minbarida chiqish qilgan. Xususan, 2023-yil mart oyida u BMTning Suv resurslari bo‘yicha konferensiyasida qatnashib, «Orol madaniyat sammiti» loyihasini taqdim etgan va mamlakatning suv resurslarini boshqarish sohasidagi muammolari hamda erishilgan natijalar haqida so‘zlagan.