Shavkat Mirziyoyev transport-logistika sohasidagi yirik loyihalar taqdimoti bilan tanishdi

Prezident Shavkat Mirziyoyev transport-logistika sohasida amalga oshirilayotgan yirik infratuzilma loyihalari bo‘yicha taqdimot bilan tanishdi.

Ta’kidlanishicha, iqtisodiyotning jadal rivojlanishi, sanoat ishlab chiqarishi va tashqi savdo hajmlarining ortib borishi transport infratuzilmasini izchil modernizatsiya qilishni talab etmoqda. O‘zbekistonni Tinch okeanidan Yevropagacha bo‘lgan eng qisqa quruqlik transport yo‘lagining muhim bo‘g‘iniga aylantirish ustuvor vazifalardan biri etib belgilangan.

Transport sohasiga 9,1 milliard dollar investitsiya jalb qilinadi

2030-yilgacha:

• transport xizmatlari hajmini ikki baravar oshirish;
• sohaga 9,1 milliard dollar investitsiya jalb qilish;
• transport xizmatlari eksportini 5,7 milliard dollarga yetkazish rejalashtirilgan.

Taqdimotda ushbu maqsadlarga erishishga qaratilgan loyihalarning amalga oshirish muddati, moliyalashtirish manbalari va kutilayotgan natijalari muhokama qilindi.

Toshkent va Buxoroda yangi aeroportlar qurilmoqda

Aeroport infratuzilmasini rivojlantirish doirasida Toshkent va Buxoroda umumiy qiymati qariyb 3 milliard dollar bo‘lgan yangi aeroport majmualari barpo etilmoqda. Yangi Toshkent xalqaro aeroporti dastlabki bosqichda yiliga 20 million yo‘lovchiga xizmat ko‘rsatish imkoniyatiga ega bo‘ladi.

Yangi Buxoro xalqaro aeroportida aerodrom infratuzilmasi qurilmoqda. Yo‘lovchi terminalini qurish va boshqarish uchun xususiy hamkorni jalb etish maqsadida xalqaro tender o‘tkazilmoqda.

Bundan tashqari:

• Urganch va Namangan aeroportlarini davlat-xususiy sheriklik asosida modernizatsiya qilish;
• Andijon aeroportiga xususiy operator jalb etish ishlari ham davom etmoqda.

Pulli avtomobil yo‘llari tarmog‘i kengayadi

O‘tgan oy qiymati 2,2 milliard dollar bo‘lgan Toshkent – Samarqand pulli avtomobil yo‘li qurilishiga start berildi. Shuningdek, Urganch va Xiva shaharlarini bog‘lovchi ilk pulli yo‘l foydalanishga topshirilgan.

Yig‘ilishda:

• Toshkent – Samarqand loyihasining keyingi bosqichlarini moliyalashtirish;
• Toshkent – Andijon;
• Toshkent – Bo‘stonliq pulli yo‘llari uchun investorlarni aniqlash masalalari muhokama qilindi.

Temir yo‘l infratuzilmasi modernizatsiya qilinadi

Yuk tashish hajmlarining ortishi va yangi tezyurar poyezdlar qatnovining yo‘lga qo‘yilishi sabab temir yo‘l tarmoqlarini rivojlantirish masalasi ham ko‘rib chiqildi.

Modernizatsiya qilinadigan asosiy yo‘nalishlar:

• Maktaaral – Sirdaryo;
• Angren – Pop;
• Toshg‘uzor – Boysun – Qumqo‘rg‘on;
• Toshkent – Samarqand;
• To‘qimachi – Angren.

Ushbu ishlar uchun 200 million dollar yo‘naltirish hisobiga temir yo‘l uchastkalarining o‘tkazuvchanligini 25-30 foizga oshirish mumkinligi qayd etildi.

Shuningdek:

• Xitoy – Qirg‘iziston – O‘zbekiston temir yo‘li;
• Toshkent – Samarqand yuqori tezlikdagi alohida temir yo‘l liniyasi;
• hududiy temir yo‘llarni kengaytirish va elektrlashtirish loyihalari haqida axborot berildi.

O‘zbekiston xalqaro portlarda logistika infratuzilmasini yaratmoqda

Taqdimotda xalqaro transport koridorlarini rivojlantirish masalasiga ham alohida e’tibor qaratildi.

O‘zbekiston ishtirokida:

• Oqtau;
• Turkmanboshi;
• Boku;
• Poti;
• Anakliya portlarida logistika infratuzilmasini rivojlantirish bo‘yicha ishlar olib borilmoqda.

Xususan, Gruziyaning Poti portida logistika markazini tashkil etish bo‘yicha bitim imzolangan. Bundan tashqari, Anakliya porti va Turkiyaning Samsun hamda Istanbul portlariga chiqishni ta’minlaydigan Naxichevan temir yo‘li loyihalarida ishtirok etish imkoniyatlari o‘rganilmoqda.

17 ta yangi logistika markazi quriladi

Mamlakat ichida logistika infratuzilmasini rivojlantirish maqsadida:

• Toshkent shahri;
• Toshkent viloyati;
• Andijon;
• Surxondaryo;
• Buxoro viloyatlarida

jami 17 ta logistika markazi va terminal qurilishi rejalashtirilgan. Shuningdek, Xonobod, Angren, Yangiyo‘l, Ohangaron, Olot va Termiz tumanlarini transport-logistika markazlariga aylantirish bo‘yicha topshiriqlar ijrosi ko‘rib chiqildi.

Yuk tashish tizimi raqamlashtiriladi

Ta’kidlanishicha, yuk tashish sohasida yashirin iqtisodiyot ulushi hozir ham 42 foizdan yuqori bo‘lib qolmoqda.

Shu sababli:

• tashuvchilarning yagona reyestrini yaratish;
• elektron yo‘l varaqalarini joriy etish;
• elektron buyurtmalar tizimini yo‘lga qo‘yish;
• transport xizmatlari agregatorini yaratish;
• xalqaro tashuvlarda elektron ruxsatnomalar almashinuvini kengaytirish;
• yuklarni real vaqt rejimida kuzatish imkoniyatini yaratish taklif etildi.

Mazkur chora-tadbirlar orqali tashuvchilar uchun qulay sharoit yaratish, norasmiy xizmatlarni qonuniy maydonga olib chiqish va sohada shaffoflikni oshirish maqsad qilingan.