Shikastlangan avtomobil davlat raqamini endi onlayn almashtirish mumkin

Oʻzbekistondagi avtomobil egalari shikastlangan davlat raqam belgisini my.gov.uz portali orqali, ariza topshirish uchun YPXga bormasdan tiklashlari mumkin.

Xizmatdan foydalanish uchun my.gov.uz portalida «Shikastlangan avtotransport vositasining davlat raqam belgisini tiklash» servisni tanlash, elektron arizani toʻldirish hamda shikastlangan raqamning aniq fotosuratini ilova qilish kerak.

Murojaat vakolatli organ tomonidan koʻrib chiqilgach, arizachiga toʻlov uchun hisob yuboriladi. Toʻlov amalga oshirilgach, ko‘rsatilgan hududiy bo‘linmaga murojaat qilish, eski raqam belgisini topshirish va yangisini olish qoladi.

Xizmat narxi:

• raqam belgilar to‘plami uchun 1 980 000 soʻm (4,5 BHM);
• bitta raqam belgisi uchun 990 000 soʻm (2,25 BHM).

Idorada ta’kidlanishicha, shikastlangan raqamning fotosurati sifati arizaning ko‘rib chiqilish tezligiga ta’sir qiladi. Aniq tasvir qo‘shimcha so‘rovlarning oldini oladi va xizmatni rasmiylashtirishni tezlashtiradi.