“2026-yilgi tashabbus byudjeti” loyihalariga ovoz berish boshlandi

Oʻzbekistonda 21-avgust soat 23:59 dan boshlab “Tashabbus budjet-2026” dasturining ikkinchi mavsumida saralashdan oʻtgan loyihalar boʻyicha ovoz berish boshlanadi.

Ovoz berish jarayoni 31-avgust kuni soat 23:59 gacha davom etadi. Bu davrda fuqarolar o‘z mahallasi, tumani yoki shahridagi dolzarb muammolarni hal etishga qaratilgan loyihalarni qo‘llab-quvvatlashi mumkin.

Iqtisodiyot va moliya vazirligi hamkorlik asosidagi loyihalar tashabbuskorlariga ajratilishi lozim bo‘lgan mablag‘larni 21-avgust soat 17:00 ga qadar tranzit hisob raqamlariga o‘tkazish zarurligini eslatdi.

Gʻoliblar ochiq ovoz berish natijalariga koʻra aniqlanadi. Fuqarolar tomonidan eng koʻp qoʻllab-quvvatlangan loyihalar amalga oshirish uchun moliyalashtiriladi. Vazirlik aholini ovoz berishda faol ishtirok etishga chaqirib, ularning tuman va shaharlarida qanday tashabbuslar amalga oshirilishi fuqarolarning tanlovi ekanligini ta’kidladi.