OpenAI oʻsmirlar uchun ChatGPT ning maxsus versiyasini ishga tushirdi

OpenAI kompaniyasi ChatGPT for Teens deb nomlangan yangi xizmatni taqdim etdi. U 13 yoshdan 17 yoshgacha bo‘lgan foydalanuvchilarga mo‘ljallangan bo‘lib, tizim voyaga yetmagan foydalanuvchini aniqlaganida ushbu rejim avtomatik ravishda yoqiladi.

Kompaniya ma’lumotlariga ko‘ra, yangi versiya o‘smirlarga o‘qish, tanqidiy fikrlashni rivojlantirish va sun’iy intellektdan xavfsiz foydalanishda yordam berish uchun yaratilgan. OpenAI xizmatni ishlab chiqishda o‘smirlar xavfsizligini birinchi o‘ringa qo‘yish, real hayotdagi qo‘llab-quvvatlashni rag‘batlantirish, yosh xususiyatlarini hisobga olish va tizim ishini ochiq tushuntirish tamoyillariga amal qilganini bildirgan.

Yangi versiyaning asosiy imkoniyatlaridan biri Study Mode hisoblanadi. Bu rejim tayyor javoblarni berish o‘rniga foydalanuvchiga mavzuni tushunishga yordam beradigan yo‘naltiruvchi savollar va bosqichma-bosqich tushuntirishlarni taklif qiladi. Shuningdek, tizim uy vazifasini shunchaki ko‘chirib olishga urinishlarni aniqlab, o‘quv rejimidan foydalanishni tavsiya qiladi.

ChatGPT for Teens tarkibiga testlar, o‘quv materiallarining vizual ko‘rinishlari va Study Hours funksiyasi ham kiritilgan. Bu imkoniyat ota-onalar yoki o‘smirlarga ma’lum vaqt oralig‘ida o‘quv rejimini avtomatik yoqish imkonini beradi.

Xizmatda xavfsizlik choralari ham kuchaytirilgan. O‘smirlar uchun zararli yoki yoshiga mos kelmaydigan kontentga nisbatan qo‘shimcha cheklovlar joriy etilgan. Ota-onalar esa maxsus nazorat vositalari orqali ayrim sozlamalarni boshqarishi, xavfli holatlar bo‘yicha bildirishnomalar olishi va foydalanish vaqtiga cheklov o‘rnatishi mumkin.