Samarqand maydoni qariyb 29 ming gektarga koʻpayadi

8-avgust kuni Oliy Majlis Senati Samarqand shahri hamda Samarqand viloyatining qator tumanlari chegaralarini o‘zgartirish to‘g‘risidagi qarorni qabul qildi. Qarorga ko‘ra, viloyat markazi hududi Oqdaryo, Pastdarg‘om, Toyloq va Samarqand tumanlari yerlari hisobidan kengaytiriladi.

Hujjatga muvofiq, Samarqand shahri tarkibiga qo‘shimcha ravishda 17 226,5 gektar yer qo‘shiladi. Shu bilan birga, Samarqand tumani tugatiladi va uning 28 295 gektar hududi Toyloq tumaniga o‘tkaziladi. Shaharga o‘tkazilayotgan yerlarning eng katta qismi, ya’ni 13 308 gektar Samarqand tumaniga to‘g‘ri keladi. Shuningdek, Oqdaryo tumanidan 1410,6 gektar, Toyloq tumanidan 1265,6 gektar va Pastdarg‘om tumanidan 1242,3 gektar yer ajratiladi.

Loyiha muhokamasi davomida ta’kidlanganidek, chegaralarni o‘zgartirishdan maqsad nafaqat shahar hududini kengaytirish, balki yillar davomida to‘planib qolgan ma’muriy muammolarni ham bartaraf etishdir. Ayrim hollarda turar joylar va mahallalar shahar hamda tuman hududlari o‘rtasida bo‘linib qolgan bo‘lib, bu kadastr hujjatlarini rasmiylashtirish, kommunal xizmatlar ko‘rsatish va infratuzilmani boshqarishda qiyinchiliklar tug‘dirgan.

Kengayishdan so‘ng Samarqand maydoni taxminan 11,8 ming gektardan 28,9 ming gektargacha oshadi. Shahar aholisi soni esa 600 mingdan ortiq ko‘rsatkichdan qariyb 880 ming kishiga yetadi. Natijada Samarqand millionlik shahar maqomiga yanada yaqinlashadi.

Shu bilan birga, transport tizimini modernizatsiya qilish ham rejalashtirilmoqda. Transport vazirligi yangi hududlarni shahar infratuzilmasiga integratsiya qilish, yo‘llardagi yuklamani kamaytirish va jamoat transporti faoliyatini yaxshilash maqsadida Samarqandning transport bosh rejasini yangilamoqda.

Qishloq xo‘jaligi yerlarini saqlab qolish va ekologik muvozanatni ta’minlash masalalariga ham alohida e’tibor qaratilgan. O‘tkazilayotgan yerlarning 6263 gektari o‘z toifasini saqlab qoladi. Shuningdek, barcha o‘zgarishlar avval mahalla aholisi bilan muhokama qilingan va mahalliy xalq deputatlari kengashlari tomonidan qo‘llab-quvvatlangan.

Shaharni kengaytirish Samarqandni uzoq muddatli rivojlantirish strategiyasining bir qismi hisoblanadi. Avvalroq taqdim etilgan 2045-yilgacha mo‘ljallangan bosh reja shahar aholisi sonini 1,2 million kishiga yetkazish, 11 ming gektardan ortiq yangi yashil hududlar barpo etish, yo‘l tarmog‘ini kengaytirish va zamonaviy jamoat transportini rivojlantirishni nazarda tutadi.