Toshkentdagi milliy bogʻda toʻrt yoshli qiz choʻkib ketdi

Toshkentdagi Alisher Navoiy nomidagi Milliy bogʻ plyajida fojia yuz berdi. Toʻrt yoshli qizaloq suzish chogʻida choʻkib ketdi.

Bosh prokuratura xabariga koʻra, voqea 5-avgust kuni soat 16:30 atrofida sodir boʻlgan. Shoshilinch tibbiy yordam markazi orqali 102 xizmatiga voqea haqida xabar berilgan. Avvalroq ayol plyajga 4 va 8 yoshli ikki nabirasi bilan kelgani aniqlangan. Kichik qiz suzish paytida oʻzini suv ostida topib, choʻkib ketgan.

Voqea joyiga yetib kelgan shifokorlar bolaga birinchi tibbiy yordam koʻrsatishgan, biroq uning hayotini saqlab qola olmagan. Qayd etilishicha, marhumning jasadida zoʻravon oʻlim yoki tan jarohati belgilari topilmagan. Oʻlimning aniq sababini aniqlash uchun sud-tibbiy ekspertiza tayinlandi.

Hozirda hodisa yuzasidan surishtiruv ishlari olib borilmoqda. Voqea holatlariga prokuratura, tergov-tezkor guruhi xodimlari hamda Sud-tibbiyot ekspertizasi byurosi mutaxassislari tomonidan aniqlik kiritilmoqda.