Chinoz tumani hokimi obodonlashtirilmagan mahallalarga “Uyatli mahalla” yozuvli plakatlarni osmoqda

Toshkent viloyati Chinoz tumani hokimi Sherzod Solihov obodonlashtirilmagan mahalla va xonadonlarni omma oldida “sharmanda qilish” amaliyotini joriy qildi. Yig‘ilishda tasvirga olingan video 27-iyul kuni tuman hokimligi Telegram-kanalida e’lon qilindi va ijtimoiy tarmoqlarda keng tarqaldi.

Videoda Solihov “Sharmanda mahalla” deb yozilgan plakatlarni shaxsan o‘zi olib, o‘rilmagan o‘tlar, uyulib yotgan axlatlar, uylar oldida gul va ko‘chatlar yo‘qligi uchun ularni zudlik bilan “Birlik” mahallasiga osib qo‘yishni buyuradi. “Xalq ko‘radigan joyga osib qo‘y. “Birlik” mahallasi — sharmanda mahalla”, — deydi hokim.

Mahallalar uchun plakatlardan tashqari, “Sharmanda xonadon” degan ikkinchi shior ham joriy etildi. Mahalla raislariga darvozalarni bo‘yash, uylarni oqlash, gul ekish va tutash hududlarni tartibga keltirish uchun bir kun muhlat berildi. “Agar ertaga kechgacha bajarmasa, o‘zim prinsipiallik qilib, bu uyga “Sharmanda xonadon” yozuvini ilib qo‘yaman”, — deya ogohlantirdi Solihov.

Hokim, shuningdek, mahallalarga biriktirilgan 40 nafar korxona va tashkilot rahbariga ularning holatini o‘rganib, mahalla raislari uylarining darvozasi, devorlari, hovlisi va o‘simliklar mavjudligini suratga olishni topshirdi. Har bir uydan olingan to‘rttadan suratli hisobot shaxsan hokimning o‘ziga topshirilishi lozim.