Oʻzbekistonda havo harorati +35 darajagacha tushadi

Avgust oyining anomal issiq boshlanishidan soʻng, bu hafta Oʻzbekistonda havo harorati biroz pasayadi. Oʻzgidrometning xabar berishicha, ish haftasi davomida havo +35...+38 darajagacha, hafta oʻrtalariga kelib esa +32...+35 darajagacha isishi mumkin.

Mamlakat boʻylab havo biroz bulutli boʻladi, yogʻingarchilik boʻlmaydi. Faqat togʻli hududlarda va 4-avgust kuni Fargʻona vodiysida qisqa muddatli yomgʻir yogʻib, momaqaldiroq boʻlishi mumkin. Toshkent viloyati va Fargʻona vodiysining togʻ oldi va togʻli hududlarida sel hodisalari kuzatilishi mumkin.

Istisno - mamlakatning janubida dushanba kuni issiqlik +40...+43 darajagacha, 4-7 avgustda esa +38...+40 darajagacha saqlanadi.

Toshkentda 3 va 6-7 avgust kunlari havo harorati +35...+38 daraja, 4-5 avgustda +33...+35 daraja issiq boʻladi. Kechasi +20…+23. Sharqdan 3–8 m/s tezlikda esayotgan shamol 4-avgustda 12–15 m/s gacha kuchayishi mumkin, ba’zi joylarda changli shamol kuzatiladi.