Oʻzbekiston debyut jahon chempionatini yakunladi - uchta oʻyin, uchta magʻlubiyat

Oʻzbekiston milliy terma jamoasi “K” guruhida soʻnggi oʻrinni egallab, JCh-2026ni tark etdi. Atlantadagi “Mersedes-Benz” stadionida boʻlib oʻtgan final uchrashuvida Fabio Kannavaro shogirdlari Kongo DR termasiga 1:3 hisobida imkoniyatni boy berdi.

Oʻzbekiston oʻyinni yorqin boshladi: 10-daqiqadayoq jamoa sardori Eldor Shomurodov Abbosbek Fayzullaevning uzatmasini qabul qilib, darvozabonni quvib oʻtib, hisobni ochdi. 17-daqiqada kongoliklar javob golini kiritishdi, ammo VAR qoidabuzarlikni aniqladi va golni bekor qildi. Tanaffusga qadar ustunlik saqlanib qoladigandek tuyuldi.

Biroq ikkinchi boʻlim hammasini ostin-ustun qildi. 68-daqiqada Yoxan Vissa penaltini golga aylantirib hisobni tenglashtirdi, 78-daqiqada Fiston Mayele Kongo Demokratik Respublikasini oldinga olib chiqdi, qoʻshib berilgan vaqtda Vissa dubl qayd etdi.

Kannavaro jamoasi guruh bosqichini uchta magʻlubiyat va 2:11 hisobidagi farq bilan yakunladi. K guruhi natijalariga koʻra, Kolumbiya 7 ochko bilan birinchi, Portugaliya 5 ochko bilan ikkinchi, Kongo DR 4 ochko bilan eng yaxshi uchinchi jamoalar reytingi orqali pley-offga chiqdi. Kongoliklar 1/16 finalda Angliya bilan oʻynaydi.

Oʻzbekiston uchun bu turnir tarixiy ahamiyatga ega boʻldi – mamlakat tarixidagi birinchi jahon chempionati. Jamoa 3ta oʻyinda 2ta gol urib, 11ta gol oʻtkazib yubordi.Birinchi davradagi yagona gol – Fayzullaevning Kolumbiyaga urgan goli Oʻzbekiston termasining jahon chempionatidagi ilk goli sifatida tarixga kirdi.