Argentinada dunyodagi eng baland Messining haykali ochildi

21-iyun kuni Argentinaning Cutral-Co shahrida Lionel Messining 26 metr balandlikdagi va 70 tonna vaznga ega haykali ochildi. Bu futbolchiga bag‘ishlangan dunyodagi eng baland yodgorlik hisoblanadi.

Haykal muallifi — mahalliy haykaltarosh Aldo Beroisa. Ish taxminan bir yil davom etdi. Dastlab rassomga Messining bo‘yi — 1,72 metr balandlikda haykal yaratish taklif qilingan. Biroq Beroisa bunday o‘lchamni yetarli deb hisoblamadi va shahar hokimiyati 26 metrlik loyihani ma’qulladi.

Haykalda Messi Argentina terma jamoasi formasida, tizzalab o‘tirgan holda va o‘ng qo‘lini yuqoriga ko‘targan holatda tasvirlangan. Tizzalari orasida — jahon chempionati kubogi. Ko‘krak qismida esa Argentinaning chempionliklarini ifodalovchi uchta oltin yulduz bor.

Yodgorlik milliy 22-trassa va Manuel Savio ko‘chasining chorrahasida joylashgan — bu hududning asosiy transport yo‘llaridan biri. Ochilish marosimida shahar meri haykal butun dunyodan sayyohlarni jalb qilishi kerakligini ta’kidladi.

Bunga qadar eng yirik haykal 21 metr balandlikdagi Messining Hindistonning Kalkutta shahridagi haykali edi. U iyun oyining boshida kuchli shamolda konstruktsiya barqaror emasligi haqidagi mahalliy aholi shikoyatlari sabab demontaj qilingan.

Messi — sakkiz karra “Oltin to‘p” sohibi, 2022-yilgi jahon chempioni va to‘rt karra Chempionlar ligasi g‘olibi. 2026-yilgi jahon chempionatida u Jazoirga qarshi o‘yinda xet-trik qayd etib, jahon chempionatlari tarixida urilgan gollar soni bo‘yicha Miroslav Kloze bilan tenglashdi — 16 ta gol.