Xataydagi yangi tumanga Oʻzbekiston nomi berildi

Turkiyaning Hatay viloyatining Arsuz tumanida “Oʻzbekiston” mahallasi hamda Prezident Shavkat Mirziyoyev nomidagi xiyobon hamda Toshkent va Samarqand koʻchalarining ochilishi boʻlib oʻtdi. Loyiha Oʻzbekiston tomonidan 2023-yil 6-fevraldagi dahshatli zilziladan soʻng mintaqani tiklash doirasida qurilgan turar-joy majmuasi negizida amalga oshirildi.

Marosimda ikki davlat hokimiyati vakillari, jumladan, Oliy Majlis Qonunchilik palatasi Spikeri Nuriddin Ismoilov, Turkiya parlamenti raisi Numan Kurtulmush, Hatay viloyati gubernatori Mustafo Masatli ishtirok etdi.

Noʻ’mon Kurtulmushning aytishicha, mahallaning tashkil etilishi, koʻcha va xiyobonlarga oʻzbek nomlarining berilishi turk xalqining samimiy minnatdorligidan dalolatdir. Uning ta’kidlashicha, bu qadam zilziladan keyingi eng ogʻir kunlarda Turkiyani qoʻllab-quvvatlagan Oʻzbekistonga boʻlgan hurmatni aks ettiradi.

Hatay viloyati rahbari Mustafo Masatli alohida ta’kidlab oʻtdiki, koʻrsatilgan yordamlar viloyat aholisi xotirasida abadiy saqlanib qoladi. Uning soʻzlariga koʻra, turar-joy majmuasiga “Oʻzbekiston” nomi berilishi ikki xalqning mustahkam doʻstligi va birligi ramziga aylandi.

Yangi mahalla poydevoriga aylangan turar-joy majmuasi 300 dan ortiq xonadonli 24 ta koʻp qavatli uyni oʻz ichiga olgan va zarur infratuzilma bilan toʻliq jihozlangan. U Oʻzbekiston tomonidan zilziladan jabr koʻrgan oilalar uchun maxsus qurilgan boʻlib, insonparvarlik yordamining asosiy loyihalaridan biri hisoblanadi.

2023-yilgi zilzila Turkiya uchun eng halokatli zilzila deya baholanadi. Uning dastlabki kunlarida Oʻzbekiston jabrlangan hududlarga qutqaruvchilar va shifokorlarni yuborib, minglab jabrlanganlarga yordam koʻrsatgan.

Hatay shahrida Oʻzbekiston mahallasi, Shavkat Mirziyoyev xiyoboni hamda Toshkent va Samarqand koʻchalarining ochilishi gumanitar hamkorlikning davomi, ikki davlat oʻrtasidagi strategik sheriklikning tasdigʻi sifatida baholanmoqda.