Olti nafar yirik bloger 3,1 mlrd so‘m soliqni kam to‘ladi

O‘zbekistonda olti nafar yirik bloger tomonidan taxminan 3,1 mlrd so‘m soliq to‘lanmagani aniqlandi. Bu haqda Soliq qo‘mitasi ma’lum qildi.

Ma’lumotga ko‘ra, natijalar 8-iyun kuni blogerlar faoliyatini soliq ma’murchiligi bo‘yicha o‘tkazilgan onlayn muloqot davomida e’lon qilingan. Mutaxassislar jami 110 nafar bloger faoliyatini tahlil qilgan.

Ularning 55 nafari o‘zini o‘zi band qilgan shaxs sifatida, 33 nafari yakka tartibdagi tadbirkor sifatida, yana 22 nafari jismoniy shaxs sifatida faoliyat yuritadi.

2025-yilda ular tomonidan deklaratsiya qilingan daromad 2,7 mlrd so‘mni tashkil etgan. Shu bilan birga, to‘langan soliqlar atigi 110 mln so‘mni tashkil qilgan.

Soliq qo‘mitasi haqiqiy daromad bundan ancha yuqori ekanini qayd etdi. Xususan, oltita yirik blogerning reklama joylashtirishlari tahlil qilinganda, davlat byudjetiga 3,1 mlrd so‘m soliq to‘lanmagani aniqlangan. Mazkur hisob-kitoblar mavjud ma’lumotlar asosida taxminiy hisoblanadi.

Gap ijtimoiy tarmoqlarda 3 mln dan ortiq obunachiga ega blogerlar haqida bormoqda. 2025-yilda ular 360 ta storis va 184 ta reklama posti joylashtirgan. Ushbu faoliyatdan olingan umumiy daromad taxminan 26 mlrd so‘mga baholanmoqda. Shu summadan qo‘shilgan qiymat solig‘i to‘lanishi kerak edi.

Soliq qo‘mitasi blogerlik faoliyati ham tadbirkorlik ekanini ta’kidladi. Shu bilan birga, o‘zini o‘zi band qilgan shaxslar rasmiy ravishda xodim yollay olmaydi, biroq amalda ko‘plab blogerlar administrator va reklama menejerlari bilan ishlaydi.

Aniqlangan holatlar bo‘yicha blogerlarga faoliyatini qonunchilik talablariga moslashtirish uchun uch oy muddat berildi.