Oʻzbekistonda oliy oʻquv yurtlari bitiruvchilarini ishga joylashtirish choralari kuchaytiriladi

O‘zbekiston Prezidenti Shavkat Mirziyoyev oliy ta’lim muassasalari bitiruvchilarini ish bilan ta’minlash bo‘yicha yangi takliflarni ko‘rib chiqdi. Asosiy e’tibor yoshlarni tizimli qo‘llab-quvvatlash va yangi ish o‘rinlarini yaratishga qaratildi.

Bitiruvchilar soni ortmoqda

Prognozlarga ko‘ra, 2026-yilda mamlakat oliygohlarini qariyb 320 ming talaba tamomlaydi. Bu so‘nggi yillarda oliy ta’lim qamrovi kengaygani bilan izohlanadi.

Shu sababli bitiruvchilarni ish bilan ta’minlash uchun manzilli yondashuv, mavjud bo‘sh ish o‘rinlariga yo‘naltirish va oliygohlardagi karyera markazlari faoliyatini rivojlantirish muhim ahamiyat kasb etadi.

Biznes va startaplarga e’tibor

“Kelajakka qadam” dasturi asosiy mexanizmlardan biri bo‘lib qolmoqda. 2025-yilda ushbu dastur doirasida 6 mingdan ortiq loyiha uchun 378 mlrd so‘m ajratilib, 8 mingga yaqin bitiruvchi ish bilan ta’minlandi.

2026-yilda esa 500 mlrd so‘m ajratilib, 8 mingdan ortiq loyiha qo‘llab-quvvatlanadi hamda 10 mingga yaqin ish o‘rni yaratiladi.

Bundan tashqari, dastur doirasini kengaytirish va tadbirkorlarga qo‘shimcha rag‘bat berish taklif etildi.

Yagona tizim joriy etiladi

Bitiruvchilarning bandligini monitoring qilish career.edu.uz platformasi orqali amalga oshiriladi. Jarayonga mahalliy hokimiyatlar ham jalb qilinib, yagona vertikal tizim shakllantiriladi.

Shu bilan birga, vazirliklar va hududiy idoralar zimmasiga natijadorlik bo‘yicha mas’uliyat kuchaytiriladi.

Karyera markazlari kuchaytiriladi

Barcha oliygohlarda karyera markazlari faoliyati faollashtiriladi. Ularning samaradorligi “bitiruvchi sifati indeksi” asosida baholanadi.

Eng yuqori natija ko‘rsatgan 20 ta markaz har biri 500 mln so‘mdan mablag‘ oladi.

2026 yilda quyidagi tadbirlar o‘tkaziladi:

• oliygohlar darajasida 360 ta bo‘sh ish o‘rinlari yarmarkasi;
• fakultetlar darajasida 750 ta yarmarka;
• 1000 dan ortiq ish beruvchilar bilan uchrashuvlar.

Shuningdek, hududlarda TalabaExpo-2026 ko‘rgazmalari kengaytiriladi, bu yerda yoshlar bevosita ish beruvchilar bilan uchrashadi.

Ta’lim tizimidagi yangiliklar

2026/2027 o‘quv yilidan boshlab barcha oliygohlarda “Tadbirkorlik asoslari” fani joriy etiladi. Bu talabalarga biznes yuritish ko‘nikmalarini shakllantirishga yordam beradi.

Shu bilan birga:

• talabalar startaplari qo‘llab-quvvatlanadi;
• ishlab chiqarish korxonalari bilan hamkorlik kengaytiriladi;
• amaliyot va diplom ishlarini korxonalarda o‘tash tizimi rivojlantiriladi.

Ish beruvchi bilan hamkorlik

Yana bir muhim yo‘nalish — dual ta’lim tizimini joriy etish. Bunda ish beruvchi talabaning tayyorgarligida ishtirok etadi va o‘qishni tugatgach ish bilan ta’minlaydi.

Davlat rahbari mutasaddi tashkilotlarga bitiruvchilarni ishga joylashtirish bo‘yicha tizimli va natijador ishlarni ta’minlashni topshirdi. Asosiy maqsad — ta’lim va mehnat bozori o‘rtasidagi uzviy bog‘liqlikni kuchaytirish.