“Tolibon” G‘irotda ayollar uchun qoidalarni kuchaytirdi

Afg‘onistonning G‘irot viloyatida “Tolibon” ayollar kiyinishiga qo‘yilgan talablarni kuchaytirdi. Bu haqda AmuTV mahalliy manbalar va hujjatlarga tayanib xabar berdi.

Yangi ogohlantirishga ko‘ra, oilalar ayollarning belgilangan kiyim qoidalariga amal qilishini ta’minlashi shart. Erkaklar oila a’zolarining ko‘chaga hijobsiz chiqishiga yo‘l qo‘ymasligi kerak.

Qoidalarga zid ravishda ro‘molsiz, yuzini ochib, tor kiyimda yoki pardoz bilan ko‘chaga chiqqan ayollar “axloq nazorati” xodimlari tomonidan hibsga olinishi mumkin.

Talablarni bajarmagan erkak qarindoshlar ham javobgarlikka tortilib, sud organlariga topshiriladi.

Mahalliy aholiga ko‘ra, so‘nggi oylarda tekshiruvlar kuchaygan. Shaharning gavjum joylarida nazorat punktlari tashkil etilgan.