Kannaavaro O‘zbekiston terma jamoasining Kanadadan mag‘lubiyatiga izoh berdi

O‘zbekiston terma jamoasi bosh murabbiyi Fabio Kannaavaro Kanada terma jamoasiga qarshi o‘tkazilgan o‘rtoqlik uchrashuvidagi mag‘lubiyatga izoh berdi. Matbuot anjumanida u o‘yin yakunlarini sarhisob qildi, xatolarga to‘xtaldi va futbolchilarning harakatlarini baholadi.

Uning so‘zlariga ko‘ra, o‘rtoqlik uchrashuvlari rasmiy turnirlarga tayyorgarlik uchun xizmat qiladi va muammoli jihatlarni aniqlash imkonini beradi. Murabbiy xatolar tabiiy ekanini, muhim jihat esa ularni tizimli tarzda bartaraf etish ekanini ta’kidladi.

Kannaavaro birinchi bo‘limda jamoa tartibli harakat qilganini, kompakt o‘yin ko‘rsatganini va yuqori tempni ushlab turganini aytdi. Uning bahosiga ko‘ra, aynan shu o‘yin qismi ijobiy ko‘ringan. Tanaffusdan keyin esa jamoa tempni pasaytirgan, to‘pni ko‘proq nazorat qilishga uringan va xatolarga yo‘l qo‘ygan, bu esa natijaga ta’sir qilgan.

Murabbiy o‘yin tezligini oshirish ustida ish olib borilayotganini ta’kidladi, chunki Osiyo va xalqaro futbol o‘rtasida temp jihatidan farq bor. Shu bilan birga, u birinchi bo‘lim jamoada ijobiy o‘zgarishlar borligini ko‘rsatganini qayd etdi.

Kannaavaro Kanada terma jamoasi darajasini ham yuqori baholab, uning rivojlanishi va tarkibidagi kuchli futbolchilarni tilga oldi.

Uchrashuvdan keyin jiddiy jarohatlar qayd etilmadi, futbolchilar qo‘shimcha tibbiy ko‘rikdan o‘tkaziladi. Murabbiy o‘yinga ta’sir qilgan omillardan biri sifatida sovuq ob-havoni ham aytib o‘tdi.

Jahon chempionati haqida gapirar ekan, u Portugaliya, Kolumbiya va Kongo kabi raqiblar kuchli ekanini ta’kidladi. Shu bilan birga, futbolchilarni o‘yinga e’tibor qaratishga chaqirdi. «Bu O‘zbekiston uchun ilk jahon chempionati, bu tajribadan to‘g‘ri foydalanish muhim», — dedi Kannaavaro.

Yakunda u himoyachi Abduqodir Husanovni alohida ta’kidlab, uning salohiyatini yuqori baholadi va rivojlanishni davom ettirish zarurligini qayd etdi.