1-iyundan nima oʻzgaradi

1-iyundan boshlab O‘zbekistonda biznes, farmatsevtika, qurilish va davlat boshqaruvi sohalariga ta’sir qiluvchi qator yangilik va o‘zgarishlar kuchga kiradi. Bu haqda Norma.uz xabar berdi.

Farmatsevtika uchun qo‘llab-quvvatlash

Davlat dori ishlab chiqaruvchilarni qo‘llab-quvvatlash choralarini kengaytiradi. Xususan:

• EU GMP va US FDA GMP sertifikatlarini olish, xalqaro konsalting xizmatlari va JSST prekvalifikatsiyasi uchun xarajatlarning 50% gacha qismi qoplanadi (50 ming dollargacha);
• OTM va ilmiy-tadqiqot institutlari tomonidan yaratilgan, O‘zbekistonda ishlab chiqarilmaydigan dori va tibbiy buyumlar uchun ro‘yxatdan o‘tkazish, klinik sinovlar va bioekvivalentlik tadqiqotlari xarajatlarining 80% qismi qoplanadi (8 ming dollargacha).

Biznes uchun yengilliklar

Korxonalarga davlat xaridlarida qatnashish imkoniyati saqlab qolingan holda, kichik soliq qarzi (2 BHMgacha) mavjud bo‘lsa ham ishtirok etishga ruxsat beriladi. Agar qarz oshib ketsa, u paydo bo‘lganidan keyin 10 kun ichida qatnashish mumkin.

Shuningdek, tadbirkorlarga bojxona to‘lovlarini 120 kungacha kechiktirish yoki bo‘lib to‘lash imkoniyati beriladi. Ayrim hollarda bojxona ta’minoti miqdori ham kamaytiriladi.

Import tartiblari soddalashtiriladi

Quyidagi talablar bekor qilinadi:

• xalqaro sertifikatlarga ega oziq-ovqat mahsulotlari uchun sanitariya-epidemiologik xulosa;
• tovarlarni erkin muomalaga chiqarishda karantin ruxsatnomasi.

Bunda sanitariya qoidalariga rioya etish majburiyati import qiluvchilarga yuklanadi.

Korrupsiyaga qarshi choralar

Davlat organlari xodimlari uchun korrupsiyaga chidamlilik darajasini baholash tizimi joriy etiladi. Past daraja aniqlansa, xodim kamroq xavfli lavozimga majburiy rotatsiya qilinadi.

Infratuzilma va raqamlashtirish

• Qurilish chiqindilarini qayta ishlash va utilizatsiya qilish tartibi joriy etiladi;
• Yagona milliy arxiv axborot tizimi ishga tushiriladi;
• Sun’iy intellekt asosidagi IT mahsulotlarni davlat xaridlari reyestr orqali yoki 2 500 BHMgacha to‘g‘ridan-to‘g‘ri shartnoma asosida amalga oshiriladi.

Ekologiya va qurilish talablari

Toshkentda ko‘mir va mazutda ishlaydigan yangi issiqxona xo‘jaliklarini ro‘yxatdan o‘tkazish taqiqlanadi. Shuningdek, qurilish obyektlari uchun majburiy ekologik talablar joriy qilinadi: havo monitoringi, onlayn kameralar va ekologik ekspertiza.

Yangi energiya tariflari

Elektr energiyasi uchun yangi tariflar:

• 200 kVt·soatgacha — 650 so‘m;
• 201–500 kVt·soat — 900 so‘m;
• 501–1000 kVt·soat — 1100 so‘m.

Tabiiy gaz tariflari differensial shaklda saqlanadi: isitish mavsumida (500 kub metrgacha) va boshqa davrlarda (100 kub metrgacha) — 1 kub metr uchun 1100 so‘m.