Prezident Oʻzbekiston bitiruvchilarini “soʻnggi qoʻngʻiroq” bilan tabrikladi

O‘zbekistonning barcha maktablarida “so‘nggi qo‘ng‘iroq” jarangladi. Joriy yilda 472 ming nafar bitiruvchi o‘qishni yakunlab, hayotning yangi bosqichiga qadam qo‘ymoqda.

Prezident bitiruvchilar, ularning ota-onalari va o‘qituvchilariga murojaat qilib, maktabni tamomlagani bilan tabrikladi. U yoshlar bugun mamlakat taraqqiyotining asosiy harakatlantiruvchi kuchiga aylanayotganini ta’kidladi.

Shuningdek, o‘quvchilarning yutuqlariga alohida e’tibor qaratildi: 11 mingdan ortiq bitiruvchi maktabni oltin va kumush medallar bilan tugatdi. Davlat rahbarining so‘zlariga ko‘ra, ular tengdoshlari uchun namuna bo‘lib, kelajakda ilm-fan, iqtisodiyot va boshqa sohalarda o‘z o‘rnini topishi mumkin.

Davlat yoshlarni qo‘llab-quvvatlashni davom ettiradi. Mamlakatda 207 ta oliy ta’lim muassasasi va 643 ta texnikum faoliyat yuritmoqda. Bundan tashqari, chet elda o‘qishga kirayotgan yoshlar soni ham ortib bormoqda: bu yil 171 nafar bitiruvchi xorijiy universitetlarga qabul qilindi.

Murojaatda bugungi kunda ish beruvchilar diplomdan ko‘ra real bilim va ko‘nikmalarga e’tibor qaratayotgani qayd etildi. Xususan, xorijiy tillarni bilish, raqamli savodxonlik va amaliy tajriba muhim omillar sifatida tilga olindi.

Yoshlar tashabbuslarini qo‘llab-quvvatlash uchun bir qator dasturlar amalga oshirilmoqda. Banklar yosh tadbirkorlarga 25 trillion so‘m miqdorida imtiyozli kredit ajratmoqda. Startap loyihalar uchun esa 100 million dollar mablag‘ yo‘naltiriladi. Yirik IT-kompaniyalar har yili 50 ming nafargacha yosh mutaxassisni o‘qitib, ularni ish bilan ta’minlashga tayyor.

Shuningdek, qishloq xo‘jaligida ham yangi imkoniyatlar yaratiladi — 168 ming gektar intensiv bog‘lar barpo etilishi rejalashtirilgan.

Prezident o‘z nutqida kitob mutolaasi va doimiy o‘z ustida ishlash muhimligini ham ta’kidladi. U yosh sportchilar va ijodkorlarning xalqaro miqyosdagi yutuqlarini misol sifatida keltirdi.

So‘z yakunida bitiruvchilarga o‘z kuchiga ishonch bilan oldinga intilish, bilim olishdan to‘xtamaslik va mamlakat kelajagi uchun mas’uliyatni his etish tilandi.