Sinoptiklar +35 darajagacha keskin isish haqida ogohlantirdi

Bu hafta Oʻzbekistonda asosan quruq va iliq ob-havo kutilmoqda.

12-may, seshanba kuni mamlakatning aksariyat hududlarida biroz bulutli ob-havo saqlanib, yogʻingarchilik boʻlmaydi. Fargʻona vodiysining ayrim hududlarida va togʻli hududlarda qisqa muddatli yomgʻir yogʻishi, momaqaldiroq boʻlishi mumkin. Havo harorati kunduzi +25...+28 daraja, janubiy va choʻl hududlarida esa 30...+33 darajagacha issiq boʻladi.

Chorshanba kunidan boshlab ob-havo barqarorlashadi: butun respublika hududida yogʻingarchilik toʻxtaydi. Harorat foni asta-sekin koʻtarila boshlaydi. Sinoptiklarning xabar berishicha, 15-mayga qadar havo kunduzi +32...+35 darajagacha, janubiy va choʻl hududlarida esa +36...+38 darajagacha isishi mumkin.

Shimoliy hududlar va cho‘l zonalarida ba’zi joylarda shamol tezligi 15–20 m/s gacha kuchayishi mumkin. Chang-to‘zonli shamol bo‘lish ehtimoli bor.

Poytaxtda ham quruq ob-havo kutilmoqda. Toshkent shahrida 12-may kuni havo harorati +25...+27 daraja, 13-maydan 15-maygacha boʻlgan davrda havo +32...+34 darajagacha qiziydi.