Polshada hantavirus sabab ilk karantin joriy etildi

Polshada hantavirus bilan bog‘liq ehtimoliy holat sabab birinchi bor karantin kuzatuvi joriy etildi. Sanitariya xizmatlari MV Hondius kruiz kemasidagi yo‘lovchilar bilan aloqada bo‘lgan shaxsni nazoratga oldi. Hozircha unda kasallik alomatlari kuzatilmagan, biroq u kamida 7 kun davomida tibbiy kuzatuv ostida bo‘ladi.

Mazkur voqea Atlantika okeanida yuz bergan holat bilan bog‘liq. MV Hondius kemasida 8 ga yaqin holat qayd etilgan, ulardan kamida uch nafari vafot etgan. Turli mamlakat fuqarolari kemada bo‘lgani sababli xalqaro sog‘liqni saqlash xizmatlari potensial aloqador shaxslarni aniqlash ishlarini boshladi.

Hantavirus — asosan kemiruvchilar orqali yuqadigan infeksiya hisoblanadi. Jahon sog‘liqni saqlash tashkiloti ma’lumotlariga ko‘ra, dunyo bo‘yicha har yili 10 mingdan 100 minggacha holat aniqlanadi. Kasallik kam uchrasa-da, og‘ir kechishi va yuqori o‘lim ko‘rsatkichi bilan ajralib turadi.

Virus odatda quyidagi yo‘llar bilan yuqadi:

• sichqon yoki kalamush kabi kemiruvchilarning ajralmalari orqali
• ifloslangan changni nafas orqali yutganda
• kam hollarda – teri yoki ko‘z orqali

Kasallik dastlab oddiy grippga o‘xshab boshlanadi:

• yuqori harorat
• bosh og‘rig‘i
• mushak og‘rig‘i
• holsizlik

Ammo bir necha kun ichida holat keskin og‘irlashishi mumkin. Asoratlari orasida:

• o‘pka zararlanishi va nafas yetishmovchiligi
• qon bosimining tushib ketishi
• buyrak yetishmovchiligi
• ichki qon ketishlar bor

Mutaxassislar ayniqsa “Andes” shtammi tufayli xavotir bildirmoqda. Bu hantavirusning yagona turi bo‘lib, u kamdan-kam hollarda bo‘lsa-da, insondan insonga yuqishi mumkin. Biroq bu odatda faqat yaqin va uzoq muddatli aloqada sodir bo‘ladi.

Shunga qaramay, xalqaro sog‘liqni saqlash tashkilotlari vaziyatni nazorat ostida ekanini ta’kidladi. Ularning fikricha, hantavirus keng ko‘lamli pandemiyaga aylanish ehtimoli past va u COVID-19 kabi tez tarqalmaydi.

Hozirga kelib, Yevropa davlatlari ehtiyot choralarini kuchaytirib, potensial aloqador shaxslarni kuzatuvga olmoqda.