Oʻzbekistonda oʻrtacha oylik ish haqi 7 million soʻmga yetdi

Joriy yilning birinchi choragi yakunlariga koʻra, Oʻzbekistonda oʻrtacha hisoblangan nominal ish haqi 6,83 million soʻmni tashkil etdi. Milliy statistika qoʻmitasi ma’lumotlariga koʻra, oʻtgan yilning shu davriga nisbatan bu koʻrsatkich 17,4 foizga oshgan.

Oʻrtacha ish haqining eng yuqori darajasi Toshkent shahrida qayd etilgan – oyiga 11,68 million soʻm. Ikkinchi oʻrinni Navoiy viloyati (8,45 million soʻm), uchinchi oʻrinni Toshkent va Andijon viloyatlari egallagan. Ish haqining eng yuqori oʻsish sur’ati Namangan viloyatida qayd etildi - yiliga 19 foiz. Biroq, mutlaq daromadlar darajasi boʻyicha viloyat oʻrtacha respublika koʻrsatkichlaridan pastligicha qolmoqda. Eng past oʻrtacha ish haqi hamon Qashqadaryo viloyatida qayd etilgan — 4,66 million soʻm.

Qaysi sohalar eng koʻp toʻlaydi?

Maoshlar eng tez sur’atlar bilan transport va saqlash sohasida - 22,5 foizga oʻsib, oyiga 10,7 million soʻmni tashkil etdi. Ish haqi boʻyicha moliya sektori yetakchiligicha qolmoqda: banklar va sugʻurta sohasida oʻrtacha ish haqi 18,6 million soʻmni, alohida segmentlarda esa 24 milliondan oshdi. Axborot texnologiyalari va kommunikatsiyalari sohasida ham yuqori daromadlar saqlanib qolmoqda - dasturlash va IT-konsalting boʻyicha 20 million soʻmdan ortiq. Eng kam ish haqi sogʻliqni saqlash va ijtimoiy xizmatlarda (4,1 million soʻmga yaqin), shuningdek, maktabgacha ta’lim muassasalarida – 2,5 million soʻmdan kam boʻlib qolmoqda.