Oʻzbekiston barcha maktablarni bir smenada oʻqitishni rejalashtirmoqda

O‘zbekiston Maktabgacha va maktab ta’limi vazirligi mamlakatdagi barcha maktablarni bir smenali ta’lim tizimiga o‘tkazishni strategik maqsad sifatida belgilaganini ma’lum qildi. Bu haqda vazirlik rahbariyati 21 aprel kuni o‘tkazilgan matbuot anjumanida bayon etdi.

Vazirning birinchi o‘rinbosari Sherzod Karimovning aytishicha, maktablarning bir smenada ishlashi o‘quvchilarning darsdan tashqari mashg‘ulotlarga to‘liq jalb etilishi uchun muhim shart hisoblanadi. «Faqat bir smenali tizimdagina fan va sport to‘garaklarini tizimli ravishda yo‘lga qo‘yish mumkin», — dedi u.

Vazirlik ma’lumotlariga ko‘ra, so‘nggi yillarda o‘ta to‘lib ketgan sinflar soni kamaygan bo‘lsa-da, muammo saqlanib qolmoqda. Hozirda sinflarning 5,2 foizida, ya’ni 13,5 mingga yaqin sinfda 35 nafardan ortiq o‘quvchi tahsil olmoqda. To‘liq bir smenali tizimga o‘tish va to‘garaklar faoliyatini kengaytirish uchun kamida 850 mingta yangi o‘quv joyi zarur.

Vazir o‘rinbosari Temurjon Komilovning ta’kidlashicha, bunday hajmdagi masalani qisqa muddatda hal qilib bo‘lmaydi. Har yili turli moliyalashtirish manbalari hisobidan o‘rtacha 200 mingga yaqin o‘quv joyi yaratilmoqda. Bir sinfni tashkil etish xarajati esa o‘qituvchilar, jihozlar va infratuzilmani hisobga olgan holda 120–160 mln so‘mni tashkil etadi.

Infratuzilma va rejalashtirish masalalari

Maktablardagi tig‘izlikni kamaytirish maqsadida yangi maktablar qurilishi va mavjud muassasalarda qo‘shimcha binolar barpo etish bo‘yicha takliflar kiritilmoqda. Biroq barcha hududlarda buning imkoni yo‘q — xavfsizlik, evakuatsiya va shaharsozlik talablari inobatga olinadi.

Yangi uy‑joy massivlarini rejalashtirishda esa har bir xonadonga kamida 1,5 ta o‘quv joyi to‘g‘ri kelishi bo‘yicha norma joriy etilmoqda. Vazirlikning ta’kidlashicha, bu yondashuv aholining o‘sishi oldindan prognoz qilingan hududlarda ijobiy natija bermoqda.