Ostonada Mintaqaviy ekologik sammit tadbirlari boshlandi

Qozogʻiston poytaxtida Oʻzbekiston Respublikasi Prezidenti Shavkat Mirziyoyev ishtirokidagi Mintaqaviy ekologiya sammiti tadbirlari boshlandi. Forumning tantanali ochilishi Ostonadagi Xalqaro koʻrgazmalar markazida boʻlib oʻtadi.

Sammit oʻtkaziladigan joyda Oʻzbekiston rahbarini Qozogʻiston Respublikasi Prezidenti Qosim-Jomart Tokayev kutib oldi. Tadbirlarda delegatsiyalar rahbarlari, hukumatlar, xalqaro tashkilotlar vakillari, ekologiya va barqaror rivojlanish sohasidagi ekspertlar ishtirok etmoqda.

Sammit dasturi doirasida ishtirokchilar ekologik muammolarni hal etish, “yashil” texnologiyalarni rivojlantirish va atrof-muhitni muhofaza qilish sohasida hamkorlikni mustahkamlashga qaratilgan mintaqa davlatlarining loyiha va tashabbuslari namoyish etilgan milliy pavilyonlar ekspozitsiyasi bilan tanishdi.

Sammit davomida iqlim oʻzgarishi, tabiiy resurslardan oqilona foydalanish, ekologik xavfsizlik va mintaqaviy hamkorlikni kengaytirish masalalari muhokama qilinishi kutilmoqda. Tadbirlar yakunlari boʻyicha qoʻshma qaror va tavsiyalar qabul qilish rejalashtirilgan.

Mintaqaviy ekologik sammitga Markaziy Osiyo mamlakatlari oʻrtasida barqaror rivojlanishning dolzarb masalalari boʻyicha muloqot va tajriba almashish uchun muhim platforma sifatida qaralmoqda.