Afgʻonistondagi zilzila Oʻzbekiston viloyatlarida ham sezildi

18-aprel kuni ertalab Afgʻonistonda 5,5 magnitudali zilzila sodir boʻldi. Yer silkinishlari mahalliy vaqt bilan 07:54 da qayd etilgan. Zilzila epitsentri Badaxshon viloyatida, Toshkentdan taxminan 537 kilometr janubi-sharqda joylashgan.

Seysmik kuzatuvlarga koʻra, manba taxminan 150 kilometr chuqurlikda joylashgan. Zilzila sezilarli darajada chuqurligi tufayli Oʻzbekiston hududida halokatli oqibatlarga olib kelmadi.

Mamlakatning qator hududlarida zaif seysmik tebranishlar sezildi. Surxondaryo viloyatida esa silkinishlar kuchi 2-3 ballni tashkil qilgan. Fargʻona vodiysi, Samarqand, Jizzax, Sirdaryo, Qashqadaryo viloyatlari, shuningdek, Toshkent shahri va Toshkent viloyatida 2 ballgacha yer silkinishi qayd etildi.

Qurbonlar va vayronagarchiliklar haqida ma’lumotlar yoʻq. Seysmik vaziyat tegishli xizmatlar nazoratida.