Sanitariya-epidemiologiya qoʻmitasi “Cicada” koronavirusining yangi shtammini baholadi

Axborot makonida koronavirus infeksiyasining BA.3.2 deb ataluvchi yangi varianti — «Tsikada» faol muhokama qilinmoqda. Uning aniqlangani haqida turli davlatlar OAVlarida xabarlar paydo bo‘lmoqda. Jahon sog‘liqni saqlash tashkiloti ma’lumotiga ko‘ra, hozirga kelib mazkur variant 20 dan ortiq mamlakatda, jumladan AQSh, Buyuk Britaniya, Gonkong hamda Afrika qit’asidagi bir qator davlatlarda qayd etilgan.

O‘zbekiston Sanitariya-epidemiologik osoyishtalik va jamoat salomatligi qo‘mitasida ushbu variant mamlakat aholisi uchun xavf tug‘dirmasligini ma’lum qildi. Qo‘mita raisining birinchi o‘rinbosari Nurmat Otabekovning aytishicha, BA.3.2 mutaxassislar uchun anchadan beri ma’lum bo‘lib, tez va ommaviy tarqalish xususiyatiga ega emas.

Uning ta’kidlashicha, «Tsikada» nomi shtammning uzoq vaqt davomida sezilmasdan, keskin kasallanish holatlarisiz saqlanib turish xususiyati bilan bog‘liq. Hozirda epidemiologlar vaziyatni xalqaro miqyosda ham, alohida davlatlar doirasida ham kuzatishda davom etmoqda.

Jahon sog‘liqni saqlash tashkiloti ham hozircha BA.3.2 variantini avval tarqalgan koronavirus shtammlariga nisbatan xavfliroq, deb hisoblash uchun asoslar yo‘qligini bildirmoqda. Mutaxassislar monitoringni davom ettirishni tavsiya qilgan holda, jiddiy xavf belgilarini ko‘rmayotganini qayd etmoqda.

Mavjud ma’lumotlarga ko‘ra, kasallikning kechishi aksariyat hollarda «Omikron» varianti chaqirgan infeksiyaga o‘xshash bo‘ladi. Asosiy alomatlar orasida burun bitishi, yo‘tal, tomoq og‘rig‘i, nafas yo‘llarining zararlanishi, shilliq qavatlarning qizarishi, shuningdek ayrim holatlarda hid va ta’m bilishning vaqtincha yo‘qolishi kuzatiladi.

Tibbiy kuzatuvlar mazkur variant bilan bolalar kattalarga qaraganda ko‘proq zararlanishini ko‘rsatmoqda. Mutaxassislar buni kattalar aholisining katta qismi emlangan yoki ilgari COVID-19 bilan kasallanib, immunitetga ega bo‘lgani bilan izohlamoqda. Shu bilan birga, keksalar, surunkali kasalliklari bor shaxslar, immuniteti zaif bo‘lganlar va nafas olish tizimi kasalliklariga chalinganlar alohida nazorat ostida qolmoqda.

Saneskomda oddiy profilaktik choralarni nazardan qochirmaslik va imkon qadar BA.3.2 holatlari qayd etilgan hududlardan yaqinda kelgan shaxslar bilan yaqin aloqalardan saqlanish tavsiya etilmoqda.

«Mazkur variant bilan bog‘liq holda epidemiyaga yoki yangi pandemiyaga doir xavflar haqida gapirish uchun hozircha asos yo‘q», — dedi Nurmat Otabekov.

Shuningdek, idorada O‘zbekistonda epidemiologik vaziyat barqarorligicha qolayotganini ta’kidladi. Mutaxassislarning baholashicha, aholi orasida jamoaviy immunitet darajasi qariyb 80 foizni tashkil etib, bu infeksiya tarqalishini jilovlash imkonini bermoqda. Hozirda COVID‑19 mavsumiy respirator kasalliklardan biri sifatida qabul qilinmoqda va tashvishlanish uchun sabab yo‘q.