Buxoro viloyati raqamli boshqaruvga oʻtkazilmoqda

O‘zbekiston Prezidenti Shavkat Mirziyoyev Buxoro viloyatiga tashrifi chog‘ida yangi viloyat ma’muriy markazini barpo etish jarayoni hamda hududning ijtimoiy-iqtisodiy salohiyatini raqamli tahlil qilish natijalari bilan tanishdi.

14 gektar maydonda qurilayotgan ma’muriy majmua «yagona darcha» tamoyili asosida tashkil etilmoqda. Unda viloyat va shahar hokimliklari, prokuratura, ichki ishlar organlari hamda boshqa asosiy davlat idoralari joylashtiriladi. Muassasalarni bir joyga jamlash murojaatlarni ko‘rib chiqish muddatlarini qisqartirish va aholining davlat xizmatlaridan foydalanishini yengillashtirishga xizmat qiladi.

Loyiha, shuningdek, aholi va sayyohlar uchun ochiq bo‘lgan xiyobonlar, favvoralar va yashil hududlarni o‘z ichiga olgan obodonlashtirilgan jamoat makonini barpo etishni ham nazarda tutadi.

Taqdimotning alohida qismi tuman rivojini boshqarishda sun’iy intellektdan foydalanishga bag‘ishlandi. Banklar SI tizimlari yordamida yer, suv va mehnat resurslari, infratuzilma hamda bozor talabi bo‘yicha tahlil o‘tkazdi. Bu agrarbiznes, sanoat, turizm va xizmatlar sohalarini asosiy o‘sish yo‘nalishlari sifatida belgilash imkonini berdi.

Aniqlangan imkoniyatlar orasida 15 ming gektargacha yer maydonlarini xo‘jalik aylanmasiga kiritish hamda enoturizmni rivojlantirishga yo‘naltirilgan 500 gektar yangi uzumzorlar barpo etish bor. Hisob-kitoblarga ko‘ra, 2026–2031 yillarda neft-gaz, kimyo va oziq-ovqat sanoatidagi umumiy qiymati 7,4 trillion so‘mlik loyihalar qariyb 15 mingta yangi ish o‘rni yaratadi.

Tumanning 36 ta mahallasining har biri uchun alohida iqtisodiy ixtisoslashuv belgilanmoqda. Biznes-rejalarni ishlab chiqish, moliyalashtirish va ijro ustidan nazorat sun’iy intellekt elementlariga ega raqamli platforma orqali amalga oshirilishi rejalashtirilgan. Davlat rahbari ta’kidlashicha, bunday yondashuv aholi daromadlarini barqaror oshirish va hududlarning samarali rivojlanishini ta’minlashi kerak.