Eron Bahrayndagi Amazon Web Services markaziga hujum qilganini ma’lum qildi

Islom inqilobi qo‘riqchilari korpusi (KXIR) Bahrayndagi Amazon Web Services (AWS) bulut infratuzilmasi obyektiga zarba berganini tasdiqladi. Eron harbiylari ma’lumotiga ko‘ra, ushbu hujum ularga ko‘ra “dushman faoliyatiga ko‘maklashayotgan” xorijiy kompaniyalarga nisbatan “birinchi amaliy ogohlantirish” sifatida amalga oshirilgan.

Xabarlarga ko‘ra, hujum nishoni Bahrain Telecommunications (Batelco) infratuzilmasi bilan bog‘liq holda faoliyat yuritadigan AWS ma’lumotlar markazi bo‘lgan. Mahalliy rasmiylar ushbu zarbani tasdiqlab, favqulodda xizmatlar obyekt hududida yuzaga kelgan yong‘inni bartaraf etganini bildirgan. Avvalroq Bahraynda shunga o‘xshash holatlardan so‘ng raqamli xizmatlar ishida uzilishlar kuzatilgan.

KXIR bayonotida aytilishicha, agar “dushmanona harakatlar” davom etsa, keyingi hujumlar “yanada qat’iy” bo‘lishi mumkin. Eron tomoni AWS obyektlarini AQSh manfaatlariga xizmat qiluvchi infratuzilma sifatida ko‘rib, mintaqadagi vaziyatning keskinlashuvi uchun javobgarlikni aynan AQSh zimmasiga yuklashini ta’kidlagan.

Ma’lumotlarga ko‘ra, data-markazga qilingan zarbadan tashqari, Eron Bahrayndagi metallurgiya va po‘lat sanoati korxonalari jamlangan Al-Had sanoat hududiga raketa hujumi yo‘llanganini ham ma’lum qilgan. Xalqaro ommaviy axborot vositalarining yozishicha, AWS obyektlariga hujumlar birinchi marta sodir bo‘layotgani yo‘q — mart oyining boshlarida Amazon infratuzilmasi BAA va Bahraynda dronlar tomonidan nishonga olingan, natijada ma’lumotlar markazlarining ishlashida jiddiy uzilishlar qayd etilgan.

Mutaxassislar fikricha, bulut infratuzilmasining muhim bo‘g‘inlari ishdan chiqishi mintaqadagi bank xizmatlari, aviatsiya tizimlari va telekommunikatsiya xizmatlarida qisqa muddatli uzilishlarga sabab bo‘lishi mumkin.

Vaziyat rivojlanishda davom etmoqda.